நடிகர் அதர்வா நடிப்பில் தயாராகி இருக்கும் ‘மத்தகம் 2’ எனும் இணைய தொடரின் வெளியீட்டு திகதி அதிகாரப்பூர்வமாக அறிவிக்கப்பட்டிருக்கிறது.
இயக்குநர் பிரசாத் முருகேசன் இயக்கத்தில் தயாராகி இருக்கும் புதிய இணைய தொடர் ‘மத்தகம் 2’. இதில் அதர்வா முரளி, மணிகண்டன், நிகிலா விமல், தில்நாஸ் இரானி, கௌதம் வாசுதேவ் மேனன், திருநாவுக்கரசு, சரத் ரவி, மூணார் ரமேஷ், பசங்க பாண்டி, வடிவுக்கரசி, திவ்யதர்ஷினி, இளவரசு உள்ளிட்ட பலர் நடித்திருக்கிறார்கள்.
எட்வின் சகாய் ஒளிப்பதிவு செய்திருக்கும் இந்த இணைய தொடருக்கு தர்புகா சிவா இசையமைத்திருக்கிறார். டிஸ்னி ப்ளஸ் ஹாட் ஸ்டார் எனும் டிஜிட்டல் தளத்தில் எதிர்வரும் 12 ஆம் திகதியன்று நேரடியாக இந்த இணைய தொடர் வெளியாகிறது.
‘மத்தகம்’ எனும் இணையத்தொடரின் முதல் பாகம் கடந்த ஓகஸ்ட் 18ஆம் திகதியன்று வெளியாகி பெரும் வரவேற்பை பெற்றது. நான்கு அத்தியாயங்கள் கொண்ட இந்தத் தொடரின் முதல் பாகம் பெரும் எதிர்பார்ப்புடன் நிறைவடைந்தது.
இதனைத் தொடர்ந்து, இரண்டாவது பாகத்தில் நான்கு அத்தியாயங்கள் இடம் பெற்றிருப்பதாகவும், இதில் பொலிஸ் அதிகாரியாக நடித்திருக்கும் அதர்வாவும், கேங்ஸ்டராக நடித்திருக்கும் மணிகண்டனும் ஒருவரை ஒருவர் சந்தித்துக் கொள்ளும் காட்சிகள் இடம் பெற்றிருப்பதால் பெரும் எதிர்பார்ப்பை ஏற்படுத்தி இருக்கிறது
