கிழக்கு கடற்பரப்பில் சட்டவிரோதமாக மீன்பிடியில் ஈடுபட்ட 25 பேர் கைது செய்யப்பட்டுள்ளனர்.
புதன்கிழமை (03) திருகோணமலை, பவளப்பாறை கடல் பகுதியில் மேற்கொள்ளப்பட்ட விசேட தேடுதல் நடவடிக்கையின் போது சந்தேக நபர்கள் கடற்படையினரால் கைது செய்யப்பட்டுள்ளனர்.
திருகோணமலை கடற்படையினரால் பவளப்பாறைக்கு அப்பால் அதன் கரையோர பகுதியில் விசேட தேடுதல் நடவடிக்கை மேற்கொள்ளப்பட்டது. இந்த தேடுதல் நடவடிக்கையின் போது அங்கீகரிக்கப்படாத மீன்பிடி வலைகளை பயன்படுத்தி சட்டவிரோத மீன்பிடியில் ஈடுபட்டதற்காக 5 படகுகள் மற்றும் மீன்பிடி சாதனங்களுடன் 25 பேர் கைது செய்யப்பட்டுள்ளனர்.
கைது செய்யப்பட்டவர்கள் 18 முதல் 57 வயதுக்கு இடைப்பட்டவர்கள் எனவும் அவர்கள் சீனக்குடா, கிண்ணியா மற்றும் மூதூர் பிரதேசங்களைச் சேர்ந்தவர்கள் எனவும் கடற்படையினர் தெரிவித்தனர்.
கைது செய்யப்பட்ட மீனவர்கள் மேலதிக சட்ட நடவடிக்கைகளுக்காக திருகோணமலை மாவட்ட பிராந்திய கடற்றொழில் திணைக்களத்திடம் ஒப்படைக்கப்பட்டுள்ளதாக இலங்கை கடற்படை தெரிவித்துள்ளது.
