சர்வதேச கால்பந்தாட்டச் சம்மேளனத்தின் (பீபா) 2022 ஆம் ஆண்டுக்கான, உலகின் மிகச் சிறந்த வீரர், மிகச் சிறந்த வீராங்கனை, பயிற்றுநர்கள், மற்றும் ரசிகருக்கான விருதுகளுக்கு பரிந்துரைப்பட்டவர்களின் பட்டியலை பீபா வெளியிட்டுள்ளது. ரசிகர்களும் இதற்காக தமது வாக்குகளை அளிக்கலாம்.
மிகச் சிறந்த வீரர், மிகச் சிறந்த வீராங்கனை, மிகச் சிறந்த ஆண், பெண் கோல் காப்பாளர்கள், பயிற்றுநர்கள், வருடத்தில் மிக அழகான கோல் புகுத்தியமைக்கான புஸ்காஸ் விருதுக்குரியவர், மிகச் சிறந்த ரசிகர் ஆகியோருக்கான விருதுகளும் வழங்கப்படவுள்ளன.
மிகச் சிறந்த வீரருக்கான பட்டியலில் ஆர்ஜென்டீனாவின் லயனல் மெஸி, பிரான்ஸின் கிலியன் எம்பாப்பே, பிரேஸிலின் நெய்மார், மொரோக்கோவின் அச்ரப் ஹக்கீமி ஆகியோரும் இடம்பெற்றுள்ளனர். கடந்த இரு வருடங்களில் இவ்விருதை வென்ற போலந்து வீரர் ரொபர்ட் லேவன்டோவ்ஸ்கி, கடந்த வருடம் பெலோன் டி’ஓர் விருதை வென்ற பிரெஞ்சு வீரர் கரீம் பென்ஸெமாவும் இப்பட்டியலில் இடம்பெற்றுள்ளனர்.
சிறந்த வீராங்கனை விருதுக்கான பரிந்துரைப் பட்டியலில், 2021 ஆம் ஆண்டு பீபா சிறந்த வீராங்கனை விருது, 2021, 2022 ஆம் ஆண்டுகளின் மகளிர் பெலோன் டி’ஓர் விருதுகளை வென்ற ஸ்பானிய வீராங்கனை அலெக்ஸியா புட்டேலெஸ், கடந்த வருடம் மகளிர் யூரோ கிண்ணத்தை வென்ற இங்கிலாந்து அணியின் தலைவி லியா வில்லியம்சன், அச்சுற்றுப்போட்டியில் அதிக கோல்களை (6) புகுத்திய வீராங்கனைகளான இங்கிலாந்தின் பெத் மீட், ஜேர்மனியின் அலெக்ஸாண்ட்ரா பொப் ஆகியோரும் இடம்பெற்றுள்ளனர்.
வருடத்தில் மிக அழகான கோல் புகுத்தியமைக்கான புஸ்காஸ் விருதுக்கான பரிந்துரைப்பட்டியலில் எம்பாப்பே, பிரேஸிலின் ரிச்சார்லிசன், மரியோ பலோடெலி ஆகியோரும் இடம்பெற்றுள்ளனர்.
ரசிகர்கள், தேசிய கால்பந்தாட்ட அணித்தலைவர்கள், பயிற்றுநர்கள், தெரிவுசெய்யப்பட்ட விசேட ஊடகவியலாளர்கள் ஆகியோரின் வாக்குகள் மூலம் வெற்றியாளர்கள் தெரிவு செய்யப்படுவர்.
உலகம் முழுவதும் உள்ள ரசிகர்கள் பீபாவின் FIFA.com இணையத்தளத்தில் பெப்ரவரி 3ஆம் திகதி நள்ளிரவு வரை வாக்குகளை அளிக்கலாம் அறிவிக்கப்பட்டுள்ளது.
வெற்றியாளர்கள் விபரம் பெப்ரவரி மாதம் அறிவிக்கப்படும்.
மிகச் சிறந்த ரசிகர் விருதுக்கான பரிந்துரைப்பட்டியலில், சவூதி அரேபியாவிலிருந்து 1,600 கிலோமீற்றர் தூரம் கால்நடையாக பயணம் செய்து உலகக் கிண்ணப் போட்டிகளைப் பார்வையிட்ட அப்துல்லா அல் சல்மி, போட்டியின் பின்னர் அரங்கை சுத்தப்படுத்திய ஜப்பானிய ரசிகர்கள், பெரும் எண்ணிக்கையில் திரண்டுவந்து தமது அணி வெல்வதற்கு உற்சாகமூட்டியதுடன், அவ்வணியினர் நாடு திரும்பிய பின்னர் மில்லியன் கணக்கில் திரண்டு வரவேற்பளித்த ஆர்ஜென்டீன ரசிகர்கள், ‘சிறந்த ரசிகர்’ விருதுக்கு பரிந்துரைக்கப்பட்டுள்ளனர்.
சிறந்த வீராங்கனைக்கான பரிந்துரைப் பட்டியல்:
அய்டனா பொன்மாட்டி (ஸ்பெய்ன்), டேபினா பிரேஸில், ஜெஸி பிளேமிங் (கனடா), சாம் கேர் (அவுஸ்திரேலியா), பெத் மீட் (இங்கிலாந்து), விவியன் மெய்டேமா (நெதர்லாந்து), அலெக்ஸ் மோர்கன், லேனா ஒபேர்டோர்வ் (ஜேர்மனி), அலெக்ஸாண்ட்ரா பொப் (ஜேர்மனி), அலெக்ஸா புட்டேலஸ் (ஸ்பெய்ன்), வென்டி ரெனார்ட் (ஸ்பெய்ன்), கியரா வோல்ஸ் (இங்கிலாந்து), லியா வில்லியம்சன் (இங்கிலாந்து).
சிறந்த வீரருக்கான பரிந்துரைப் பட்டியல்:
ஜூலியன் அல்வாரெஸ் (ஆர்ஜென்டீனா), ஜூட் பெல்லிங்ஹாம் (இங்கிலாந்து), கரீம் பென்ஸெமா (பிரான்ஸ்), கெவின் டி புரூய்ன் (பெல்ஜியம்);, ஏர்லிங் ஹாலெட் (நோர்வே), அச்ரப் ஹக்கீமி (மொரோக்கோ), ரொபர்ட் லெவான்டோஸ்கி (போலந்து), சாஜியோ மனே (செனகல்), கிலியன் எம்பாப்பே (பிரான்ஸ்), லயனல் மெஸி (ஆர்ஜென்டீனா), லூக்கா மோத்ரிச் (குரோஷியா), நெய்மார் (பிரேஸில்), மொஹம்மத் சலேஹ் (எகிப்து), வினிசியஸ் ஜூனியர் (பிரேஸில்).
