இலங்கை மெய்வல்லுநர் சங்கத்தின் 100 ஆவது ஆண்டை முன்னிட்டு நடத்தப்படும் 100 ஆவது தேசிய மெய்வல்லுநர் சம்பியன்ஷிப் போட்டியை சிறப்பாக செய்வதற்கு இலங்கை மெய்வல்லுநர் சங்கம் தீர்மானித்துள்ளது.
இதன்படி,தேசிய மெய்வல்லுநர் சம்பியன்ஷிப் போட்டி எதிர்வரும் ஏப்ரல் மாதம் 8 ஆம் திகதி முதல் 10 ஆம் திகதி வரையான 3 நாட்கள் தியகம மஹிந்த ராஜபக்ச விளையாட்டரங்கில் நடைபெறவுள்ளது. இதில், 735 உள்நாட்டு வீர, வீராங்கனைகள் பங்கேற்பதுடன், இந்தியா, பாகிஸ்தான், பங்களாதேஷ்,மாலைத்தீவுகள், மலேஷியா ஆகிய நாடுகளிலிருந்து 20 இற்கும் அதிகமான வீர, வீராங்கனைகள் பங்கேற்கவுள்ளமை விசேட அம்சமாகும்.
முதல் தினத்தன்று பெண்களுக்கான 10,000 மீற்றர், 1500 மீற்றர் , சம்மட்டி எறிதல், கோலூன்றிப் பாய்தல், 100 மீற்றர் சட்டவேலி ஆகியவற்றின் இறுதிப் போட்டிகள் நடத்தப்படவுள்ளன. அதே தினத்தன்று ஆண்களுக்கான 5000 மீற்றர், குண்டெறிதல், கோலூன்றிப் பாய்தல், சம்மட்டி எறிதல், 110 மீற்றர் சட்டவேலி ஆகிய போட்டிகளின் இறுதிப் போட்டி நிகழ்வுகள் நடத்தப்படவுள்ளன.
மேலும், ஏனைய சில போட்டி நிகழ்வுகளின் முதல் சுற்றுப் போட்டிகளும் இடம்பெறும்.
இரண்டாம் தினத்தன்று ஆண்கள் மற்றும் பெண்கள் ஆகிய இருபாலாருக்குமான 3000 மீற்றர் தடைத்தாண்டல், நீளம் பாய்தல், 200 மீற்றர் ஓட்டப் போட்டி, 800 மீற்றர் ஓட்டப் போட்டி, 400 மீற்றர் சட்டவேலி போட்டி ஆகியவற்றின் இறுதிப் போட்டிகள் இடம்பெறுவதுடன், பெண்களுக்கான தட்டெறிதலின் இறுதிப் போட்டியும் நடைபெறும்.
கடைசி தினமான மூன்றாவது தினத்தன்று ஆண்கள் மற்றும் பெண்கள் ஆகிய இருபாலாருக்குமான உயரம் பாய்தல், முப்பாய்ச்சல், ஈட்டி எறிதல், 100 மீற்றர், 400 மீற்றர் ஆகிய போட்டி நிகழ்வுகளுடன் ஆண்களுக்கான 1500 மீற்றர் ஓட்டப் போட்டியும் இடம்பெறவுள்ளன.
இதேவேளை, இந்த போட்டி நடைபெறும் மூன்று நாட்களிலும் ஆண்களுக்கான பத்து அம்ச போட்டி நிகழ்வுகளும், பெண்களுக்கான ஏழு அம்ச போட்டி நிகழ்வுகளும் நடத்தப்படவுள்ளமை குறிப்பிடத்தக்கது.
#No 1 TamilWebSite 
| http://Facebook page / easy 24 news | Easy24News – யூடியூப் YouTube | [email protected]
