டிஜிட்டல் தள நட்சத்திரங்களான கோபி-சுதாகர் கதையின் நாயகர்களாக முதன்மையான கதாபாத்திரங்களில் நடித்திருக்கும் பெயரிடப்படாத திரைப்படத்தின் படப்பிடிப்பு நிறைவடைந்ததாக பட குழுவினர் பிரத்யேக புகைப்படத்தை வெளியிட்டு அறிவித்திருக்கிறார்கள்.
அறிமுக இயக்குநர் விஷ்ணு விஜயன் இயக்கத்தில் தயாராகி வரும் பெயரிடப்படாத திரைப்படத்தில் பரிதாபங்கள் எனும் யூட்யூப் சேனல் மூலம் பிரபலமான டிஜிட்டல் தள நட்சத்திரங்களான கோபி, சுதாகர், வின்சு சாம், விடிவி கணேஷ், ரமேஷ் கண்ணா, சுரேஷ் சக்கரவர்த்தி, விஜி சந்திரசேகர், சுபத்ரா ராபர்ட், முருகானந்தம், பிரசன்னா உள்ளிட்ட பலர் நடித்திருக்கிறார்கள்.
கல்லூரியில் பயிலும் மாணவ மாணவிகளின் வாழ்வியலை மையப்படுத்தி தயாராகி இருக்கும் இந்த திரைப்படத்தை பரிதாபங்கள் புரொடக்ஷன்ஸ் எனும் பட நிறுவனம் சார்பில் தயாரிப்பாளர் விக்னேஷ் எஸ் சி போஸ் தயாரித்திருக்கிறார்.
இப்படத்தில் படப்பிடிப்பு முழுமையாக நிறைவடைந்திருக்கிறது. இதனை படக்குழுவினர் கேக் வெட்டி கொண்டாடி இருக்கிறார்கள். தற்போது இப்படத்தின் இறுதி கட்டப் பணிகள் தொடங்கி இருக்கிறது. விரைவில் இப்படத்தின் டைட்டில் மற்றும் ஃபர்ஸ்ட் லுக் ஆகியவை வெளியாகும் என எதிர்பார்க்கப்படுகிறது.
இதனிடையே ‘பரிதாபங்கள்’ புகழ் கோபி- சுதாகர் இதற்கு முன் பொதுமக்களிடமிருந்து நிதி திரட்டி ‘ஹே மணி கம் டுடே கோ டுமாரோ ‘ என்ற பெயரில் படத்தினை தொடங்கினார்கள் என்பதும், பிறகு பல்வேறு காரணங்களால் அப்படத்தை கைவிட்டனர் என்பதும் குறிப்பிடத்தக்கது.
