ஒற்றையாட்சியை வலியுறுத்தும் தமிழ்த் தேசியக் கூட்டமைப்பின் தலைமை மாறினால் தமிழ்த் தேசியக் கூட்டமைப்புடன் இணைந்து பயணிப்பதற்குத் தயாராக இருக்கின்றோம் என்று தமிழ்த் தேசிய மக்கள் முன்னணியின் தலைவர் கஜேந்திரகுமார் பொன்னம்பலம் தெரிவித்தார்.
தமிழ்த் தேசிய மக்கள் முன்னணியின் அலுவலகத்தில் நேற்று மாலை நடத்தப்பட்ட செய்தியாளர் சந்திப்பிலேயே அவர் இவ்வாறு தெரிவித்தார்.அவர் தெரிவித்ததாவது-,
தமிழ் மக்கள் தமிழ் தேசியத்தின் பக்கமே நிற்கின்றனர். தமிழ் மக்களுக்கு இழைக்கப்படும் அரசியல் மோசடிகளையும், நம்பிக்கைத் துரோகத்தையும் எடுத்துக் கூறினோம். தமிழ்த் தேசியக் கூட்டமைப்பின் மீதான விமர்சனங்கள் அனைத்தும் கொள்கை ரீதியானவையே. அந்த விமர்சனங்கள் சில வேளைகளில் கடுமையாக இருந்திருக்கலாம்.
ஒற்றையாட்சிக்கு இணங்கி பௌத்தத்துக்கு முன்னுரிமை வழங்க இணங்கியமையாலேயே அவ்வாறு விமர்சனங்கள் அமைந்தன.தமிழ்த் தேசியப் பேரவை மாற்றத்துக்கு பெரும் அடித்தளமாக அமைந்தது. இனத்துக்குத் துரோகம் இழைத்து வருகின்றனர் என்பதே எமது குற்றச்சாட்டு. அதற்கு எதிராகவே பேசினோம். நாம் ஒட்டுமொத்த தமிழ் தேசிய கூட்டமைப்புக்கு எதிரானவர்கள் அல்ல.
தமிழினம் நடுத் தெருவில் நிற்பதற்குத் தலைமைத்துவம் வழங்கியவர்கள் நீக்கப்பட்டு நல்லதொரு தலைமைத்துவம் இருந்தால், ஊழல் இல்லாத மோசடி இல்லாத வகையில் உள்ளூராட்சி சபையை நடத்த நல்லதொரு தலைமைத்துவம் அமைந்தால் ஒருமித்து செல்வோம்.
கூட்டமைப்பில் தெரிவு செய்யப்பட்ட உறுப்பினர்களில் தேசியத்துடன் ஊழலற்று இயங்க விரும்புவோர் எம்முடன் இணைந்து தமிழ் தேசியத்தை முன்னெடுத்துச் செல்லலாம். அவர்களை இணைக்க நாம் என்றும் தயாராகவே உள்ளோம்.
தமிழ்த் தேசியத்தைக் காப்பாற்ற, பாதிக்கப்பட்ட தாயக நிலப்பரப்பை கட்டியெழுப்ப உள்ளூராட்சி தேர்தலில் வெற்றியீட்டிய உறுப்பினர்கள் முன் வரவேண்டும். இரண்டு ஆண்டுகளுக்கு முன்னர் எம்மை மிக கேவலமாக விமர்சித்தவர்கள் வாய் மூடி நிற்கும் வகையில் நாம் உழைத்துள்ளோம்.
தமிழ் மக்கள் கோரிய எதனையும் நல்லாட்சி என்று சொல்லப்படும் இந்த ஆட்சி செய்யவில்லை. தமிழ் மக்கள் கோரியதை செய்தால் மகிந்த குழப்புவார், தெற்கு குழப்பமடையும் என்று கூறினார்கள். நாம் மகிந்தவை பன்னாட்டுச் சமூகம் முன்பாக போர்க் குற்றவாளியாக்கப் போராடியபோது மகிந்தவை காப்பற்றும் முயற்சியில் கூட்டமைப்பினர் ஈடுபட்டனர்.
தற்போது நடைபெற்று முடிந்துள்ள உள்ளூராட்சி தேர்தலில் தெற்கில் மகிந்த வெற்றியைப் பெற்றுள்ளார். அன்று மகிந்தவை காப்பற்றியவர்கள், இன்று மகிந்த வென்றவுடன் தமிழ்த் தேசியக் கட்சிகள் ஒன்றிணைய வேண்டும் என்று கோருகின்றனர் – என்றார்.
