இயக்குநரும் நடிகருமான சமுத்திரக்கனி கதாநாயகனாக முதன்மையான வேடத்தில் நடித்திருக்கும் ‘தலைக்கூத்தல்’ எனும் திரைப்படத்தின் டீசர் வெளியிடப்பட்டிருக்கிறது.
அத்துடன் இந்த திரைப்படம் எதிர்வரும் பெப்ரவரி மாதம் 3ஆம் திகதி திரையரங்குகளில் வெளியாகும் என அறிவிக்கப்பட்டிருக்கிறது.
இயக்குநர் ஜெய்பிரகாஷ் ராதாகிருஷ்ணன் இயக்கத்தில் தயாராகியிருக்கும் புதிய திரைப்படம் ‘தலைக்கூத்தல்’. இதில் சமுத்திரக்கனி, கதிர், ‘ஆடுகளம்’ முருகதாஸ், வசுந்தரா உள்ளிட்ட பலர் நடித்திருக்கிறார்கள்.
மார்ட்டின் டான்ராஜ் ஒளிப்பதிவு செய்திருக்கும் இந்த படத்துக்கு கண்ணன் நாராயணன் இசையமைத்திருக்கிறார். கிராமிய பின்னணியிலான யதார்த்த வாழ்வியலை மையப்படுத்தி தயாராகியிருக்கும் இந்த திரைப்படத்தை ஒய் நாட் ஸ்டூடியோஸ் எனும் பட நிறுவனம் சார்பில் சசிகாந்த் தயாரித்திருக்கிறார்.
இந்தப் படத்தின் ஃபர்ஸ்ட் லுக் வெளியாகி பெரும் வரவேற்பை பெற்ற நிலையில், தற்போது படத்தின் டீசர் வெளியிடப்பட்டிருக்கிறது.
டீசரில், கிராமப்புறங்களில் வயதானவர்களுக்கு கருணை அடிப்படையில் நிகழும் மரணத்தை மையப்படுத்திய காட்சிகள் இடம்பெற்று, பெற்றோர்களுக்கு இது போன்ற மரணத்தை ஏற்படுத்தலாமா என்ற கேள்வியுடன் நிறைவடைகிறது.
பெற்றோர்களுக்கும் அவரது வாரிசுகளுக்கும் இடையே உணர்வுபூர்வமான உறவு இதில் காட்டப்படுவதால் இந்த டீசருக்கு ரசிகர்களிடையே பெரும் ஆதரவு கிடைத்து வருகிறது.
