அம்மா கிரியேஷன் டி.சிவா தயாரிப்பில் மூடர்கூடம் நவீன் இயக்கத்தில் விஜய் ஆண்டனி, அருண் விஜய், ரெய்மா சென், அக்ஷரா ஹாசன், பிரகாஷ்ராஜ், ஜே.சதீஷ்குமார், சதீஷ் உள்பட பலர் நடிக்கும் படம் அக்னி சிறகுகள். நடராஜன் சங்கரன் இசை அமைக்கிறார். கே.ஏ.பாட்ஷா ஒளிப்பதிவு செய்கிறார்.
தற்போது படத்தின் பணிகள் அனைத்தும் முடிந்து இறுதிகட்ட பணிகள் நடந்து வருகிறது. விஜய் ஆண்டனி படங்களிலேயே இ இதுதான் அதிக பட்ஜெட்டில் தயாராகும் படம். படம் குறித்து தயாரிப்பாளர் டி.சிவா கூறியதாவது:
அருண் விஜய், விஜய் ஆண்டனி, அக்ஷரா ஹாசன் என வியப்பில் ஆழ்த்தும் நட்சத்திர கூட்டம் இணைந்திருக்கும் அக்னி சிறகுகள் திரைப்படம், இந்த ஆண்டின் உச்சபட்ச எதிர்பார்ப்பிற்குரிய படமாக இருக்கிறது. தற்போது இப்படத்தின் படப்பிடிப்பு இறுதிகட்டத்தை எட்டியுள்ளது. முதல்கட்ட படப்பிடிப்பு சென்னை மற்றும் கொல்கத்தாவில் படமாக்கப்பட்டது. படத்தின் முக்கியமான பொறிபறக்கும் ஆக்ஷன் காட்சிகள் அங்கு படமாக்கப்பட்டது.
இரண்டாம் கட்டப் படப்பிடிப்பு ரஷ்யாவின் மாஸ்கோ, பீட்டர்ஸ்ஃபர்க் ஆகிய இடங்களிலும் அதனைத் தொடர்ந்து கஜகஸ்தானின் அல்மாட்டி நகரிலும் படமாக்கப்பட்டது. கஜகஸ்தானில் படமாக்கப்படும் இந்தியாவின் முதல் படம் எனும் பெருமையை அக்னி சிறகுகள் பெற்றுள்ளது.
கண்களுக்கு விருந்தளிக்கும் பிரமாண்ட விஷுவல்களும், அசரவைக்கும் மார்ஷியல் ஆர்ட்ஸ் சண்டை காட்சிகளும் அங்கு படமாக்கப்பட்டுள்ளது. இயக்குநர் நவீனின் அட்டகாச கதைசொல்லல் முறையும், அவரது குழு படத்தை ஒவ்வொரு அங்குலமாக செதுக்கியுள்ளது பாராட்டுக்குரியது. இப்படம் கண்டிப்பாக தமிழ் ரசிகர்களுக்கு முன்னெப்போதும் கண்டிராத ஒரு பிரமாண்ட திரில்லர் அனுபவத்தை தரும் . என்றார்.
