பாலிவுட் ஹீரோக்களில் ஒரு சிலர் தென்னிந்திய இயக்குனர்களுக்கு முக்கியத்துவம் கொடுத்து வருகின்றனர். அவர்களில் ஒருவர் தான் இம்ரான் ஹாஸ்மி. குறிப்பாக இவர் மலையாள இயக்குனர்களுக்கு சிவப்பு கம்பளம் விரித்து வரவேற்கிறார். கடந்த ஆண்டு, பிரபல இயக்குனர் ஜீத்து ஜோசப் இயக்கத்தில் இந்தியில் ‘பாடி’ என்கிற படத்தில் நடித்தார் இம்ரான் ஹாஸ்மி. இது ஜீத்து இயக்கிய எந்த ஒரு மலையாள படத்தின் ரீமேக்காகவும் அல்லாமல் நேரடி இந்திப் படமாக உருவானது.
இந்தநிலையில் மீண்டும் ஒரு மலையாள இயக்குனருடன் இணைகிறார் இம்ரான் ஹாஸ்மி. இது ஏற்கனவே 2017ல் மலையாளத்தில் பிரித்விராஜ் நடிப்பில் வெளியாகி வெற்றி பெற்ற ‘எஸ்றா’ என்ற படத்தின் ரீமேக்காக உருவாக இருக்கிறது. மலையாளத்தில் இந்தப்படத்தை இயக்கிய ஜெய் ஆர்.கிருஷ்ணன் என்பவரே இந்தியிலும் இந்த படத்தை இயக்குகிறார். மும்பை மற்றும் மொரீசியஸ் தீவில் இந்த படத்தின் படப்பிடிப்பு நடைபெற இருக்கிறது.
