சிங்கப்பூர் கலைஞர்கள் இணைந்து உருவாக்கி இருக்கும் படம் டான் கீ. ஸ்ட்ரீட் லைட் பிக்சர்ஸ் தயாரிக்கும் இந்தப் படத்தை இயக்கி, வில்லனாக நடித்துள்ளார் ஜோ ஜியோவானி சிங். முரளிராம் ஹீரோ, சிங்கப்பூர் பாப் பாடகி நபீஸா பேகம் ஹீரோயின். இவர்கள் தவிர சிங்கப்பூர் கலைஞர்கள் ஷரீன் காஞ்சவாலா, ஹபிபி, விக்கி, பிரபு உள்பட பலர் நடித்துள்ளனர். சலீம் பிலால் ஒளிப்பதிவு செய்துள்ளார். பிரவீன் சரவணன் இசை அமைத்துள்ளார். படம் குறித்து இயக்குனர் ஜோ ஜியோவானி சிங் கூறியதாவது:
காதலியால் கைவிடப்பட்டு வேலையில்லாமல் வருமானமின்றி பல்வேறு பிரச்சனைகளை சந்தித்துக் கொண்டிருக்கும் ஜாக், சிங்கப்பூரில் இருக்கும் தனது உறவுக்காரரை சந்தித்து வேலை கேட்கிறார். ஆனால், அவரோ சட்டத்துக்கு புறம்பான வேலைகளை செய்து கொண்டிருக்கிறார். எனினும் வேறு வழியின்றி அதே வேலை செய்து படிப்படியாக பெரிய கேங்ஸ்டராகிறான் ஜாக்.
ஒரு சமயத்தில் ஒரு பெண்ணை துப்பாக்கி முனையில் கடத்த, அவள் மிகப் பெரிய டானின் மகள் என்று தெரிய வர அதிலிருந்து எவ்வாறு வெளியே வருகிறான் என்பதை கூறுவதே கதை. சிங்கப்பூர் கேங்ஸ்டர்களின் வாழ்க்கை முறைகள் மற்றும் அவர்கள் சந்திக்கும் பிரச்சனைகளைப் பற்றிய கதை. இதன் படப்பிடிப்பு முழுக்க முழுக்க சிங்கப்பூரிலேயே இருகட்ட படப்பிடிப்பாக 50 நாட்கள் நடைபெற்று முடிவடைந்தது என்றார்.
