சிட்டகாங் டெஸ்ட் போட்டியின் 3-ம் நாளான இன்று ஆஸ்திரேலிய அணி 9 விக்கெட்டுகள் இழப்புக்கு 377 ரன்கள் எடுத்து 72 ரன்கள் என்ற ஓரளவுக்கு வலுவான முன்னிலையைப் பெற்றுள்ளது.
போதிய வெளிச்சமின்மையால் ஆட்டம் முடிக்கப்பட்ட போது ஓ’கீஃப் 8 ரன்களுடனும், நேதன் லயன் ரன் எடுக்காமலும் இருந்தனர்.
டேவிட் வார்னர் தன் வாழ்நாளின் ஆகமெதுவான சதத்தை எடுத்தார், 209 பந்துகளில் சதமடித்த வார்னர் பிறகு 234 பந்துகளில் 7 பவுண்டரிகளுடன் 123 ரன்கள் எடுத்து முஸ்தபிசுர் ரஹ்மான் வீசிய கட் ஸ்விங் ஷார்ட் பிட்ச் பந்திற்கு கல்லியில் இம்ருல் கயேஸிடம் கேட்ச் ஆகி வெளியேறினார், தட்டித் தட்டி எப்படி கேட்ச் பிடிக்கக்கூடாது என்பதை வங்கதேச பீல்டர்களிடம் கற்றுக்கொள்ள வேண்டும்! சவுமியா சர்க்கார் கடந்த போட்டியில் கேட்ச்களைத் தட்டித்தட்டியே பிடித்தார், இம்ருல் கயேஸ் இன்று தட்டிதட்டிப் பிடித்தார். மொத்தத்தில் கேட்ச்கள் வந்தால் வங்கதேச வீர்ர்கள் பதற்றமடைகின்றனர் என்று புரிகிறது.
இன்று காலை தொடங்கும் போது 4-வது இன்னிங்ஸை ஆடாத அளவுக்கு முன்னிலை பெறும் முனைப்புடன் களமிறங்கியது ஆஸ்திரேலியா ஆனால் ஹேண்ட்ஸ்கம்ப், வார்னர் வெளியேற்றத்துக்குப் பிறகு வங்கதேசம் மளமளவென விக்கெட்டுகளைச் சாய்த்ததில் ஒரு பதற்றமான 4-வது இன்னிங்ஸ் விரட்டலை ஆஸ்திரேலியா சந்திக்க நேரிட்டுள்ளது. இன்று மழை காரணமாக ஆட்டம் 2 மணி நேரம் நடைபெறவில்லை.
ஹேண்ட்ஸ்கம்பின் அருமையான இன்னிங்ஸ் அவர் 82 ரன்களில் இருந்த போது முடிவுக்கு வந்தது, வார்னர் சதம் அடிப்பதற்காக ஓடி வந்தவர் வார்னர் நோ என்றவுடன் திரும்ப வேண்டியிருந்தது ஷாகிப் அல் ஹசன் நேரடியாக ஸ்டம்பைக் குறிவைத்தார்.
ஷாகிப் அல் ஹசன், மெஹதி ஹசன் மிராஸ் இருவரும் காலடித் தடங்களை நன்றாகப் பயன்படுத்தினர். பந்துகள் அவ்விடத்தில் பிட்ச் ஆனால் கடுமையாகத் திரும்பியது.
ஹேண்ட்ஸ்கம்ப், வார்னர் இணைந்து 152 ரன்களை கடினமான சூழலில் சேர்த்ததே ஆஸ்திரேலிய அணியின் தற்போதைய முன்னிலைக்குக் காரணமாக அமைந்தது. மேக்ஸ்வெல், கார்ட்ரைட் இணைந்து மேலும் ஒரு கூட்டணி அமைப்பார்கள் என்று எதிர்பார்க்கப்பட்ட பொது கார்ட்ரைட் 18 ரன்களில் தேநீர் இடைவேளைக்கு சற்று முன் மெஹதி ஹசன் மிராஸ் பந்தை எட்ஜ் செய்து வெளியேறினார். மேத்யூ வேட் தனது இடத்தை இழப்பது உறுதியாகியுள்ளது, இன்றும் சோபிக்க முடியாமல் முஸ்தபிசுர் ரஹ்மானின் இன்ஸ்விங்கருக்கு எல்.பி.ஆனார்.
கிளென் மேக்ஸ்வெல் 98 பந்துகளில் 3 பவுண்டரிகளுடன் 38 ரன்கள் எடுத்து மெஹதி ஹசன் பந்தை ஆடும்போது பந்து மட்டையின் உள்விளிம்பில் பட்டு பேடில் பட்டு எழும்ப முஷ்பிகுர் ரஹிம் முன்னால் பாய்ந்து கேட்ச் எடுத்தார், இரண்டு டிவி ரிப்ளேக்குப் பிறகு அவுட் கொடுக்கப்பட்டது. கமின்ஸ் மெஹதி ஹசன் பந்தில் 4 ரன்களுகு எல்.பி.ஆனார். ஆகர் 22 ரன்கள் எடுத்து நன்றாக ஆடி வந்த போது ஷாகிப் பந்தில் பவுல்டு ஆனார்.
வங்கதேச அணியில் மெஹதி ஹசன், முஸ்தபிசுர் ரஹ்மான் ஆகியோர் தலா 3 விக்கெட்டுகளைக் கைப்பற்ற ஷாகிப், தைஜுல் தலா 1 விக்கெட்டைக் கைப்பற்றினர், ஆஸ்திரேலியா அணி இன்னும் ஒருவிக்கெட் மீதமிருக்க 3-ம் நாள் ஆட்ட முடிவில் 72 ரன்கள் முன்னிலை பெற்றுள்ளது.
