மவுனம் பேசியதே, இனிது இனிது காதல் இனிது உள்ளிட்ட பல படங்களில் நடித்தவர் நேஹா பென்ட்சே. இவர், அதன்பின், மலையாளம், கன்னடம், இந்தி என பல மொழிகளிலும் நடித்தார். சில டி.வி., சீரியல்களிலும் நடித்து வந்தார். இவர் சமீபத்தில், ஷர்துல் பயஸ் என்ற தொழில் அதிபரை மணந்து கொண்டார். ஷர்துல் பயஸுக்கு ஏற்கனவே இரு முறை திருமணமாகி, இருவரையும் விவாகரத்து செய்து விட்டார். இந்த இரு திருமணம் வழியாக, அவர் இரு குழந்தைகளுக்கும் தந்தையானார்.
இந்நிலையில், இப்படி மூன்றாவதாக ஒருவரை திருமணம் செய்து கொண்டு விட்டீர்களே என, நேஹாவை பலரும் கேட்டுக் கொண்டே இருந்தனர். ஆனால், அதுகுறித்து, அவர் பதில் ஏதும் சொல்லாமலேயே இருந்து வந்தார். தொடர்ந்து இதே கேள்வியே மாற்றி மாற்றி கேட்கப்பட, ஒரு கட்டத்தில், இந்த கேள்வி அவருக்கு கடும் எரிச்சலை ஏற்படுத்தி விட்டது.
சமீபத்தில், ஊடகம் ஒன்றுக்கு பேட்டி அளித்த நேஹா, தன்னுடைய கோபத்தைக் கொட்டியிருக்கிறார். அதில் அவர் கூறியிருப்பதாவது: ஏதோ, உலகத்தில் எங்குமே நடக்காமல், நான் மட்டுமே, ஒருவருக்கு மூன்றாவது தாரமாக போனதாக சொல்கின்றனர். இன்று, ஒருவர் மூன்று அல்லது நான்கு பேரை திருமணம் செய்து கொள்வதெல்லாம் வாடிக்கையாகி விட்டது. தங்களுடைய வாழ்க்கைக்காகத்தான் எல்லோரும் இப்படிப்பட்ட முடிவுகளை எடுத்து, அதன் வழியில் பயணிக்கிறார் என்பதை மிக நன்றாக தெரிந்தும், இது ஏதோ மிகப் பெரிய தவறு போல பேசுவது சரியான அணுகுமுறை அல்ல. ஒரு ஆண், ஏற்கனவே இரு பெண்ணோடு உறவில் இருந்தார் என்பதைத்தான் குற்றமாக இந்த சமூகம் பார்க்கிறது. அந்த வகையில் பார்க்கும்போது, யாரும் அதற்கு விதிவிலக்காக இருக்க முடியாது. திருமணத்துக்கு முன்பே கூட, எல்லோருமே சிலருடன் தொடர்பில்தான் இருக்கின்றனர்.
