கமல்ஹாசன் ‘இந்தியன் 2’ படத்திற்குப் பிறகு ‘தேவர் மகன் 2’ படத்தில் நடிக்க உள்ளதை உறுதி செய்துள்ளார். ‘தேவர் மகன் 2’ படத்தில் கமல்ஹாசன் நடிக்க உள்ளார் என்ற தகவலை நாம் எப்போதே வெளியிட்டிருந்தோம். ‘இந்தியன் 2’ படப்பிடிப்பு முடிந்ததும் கமல்ஹாசன் இதன் படப்பிடிப்பை ஆரம்பிக்கலாம்.
‘தேவர் மகன்’ படத்தின் முதல் பாகம் 1992ம் ஆண்டு வெளிவந்து மிகப் பெரும் வெற்றியைப் பெற்றது. இப்போது 26 ஆண்டுகளுக்குப் பிறகு கமல்ஹாசன் இரண்டாம் பாகத்தைத் தயாரிக்க உள்ளார். முதல் பாகத்தை மலையாள இயக்குனர் பரதன் இயக்க இளையராஜா இசையமைத்திருந்தார். அதில் இடம் பெற்ற ‘போற்றிப் பாடடி பெண்ணே, இஞ்சி இடுப்பழகி’ பாடல்கள் மிகப் பெரும் ஹிட்டாக அமைந்தன.
இரண்டாம் பாகத்தை யார் இயக்கப் போவது, இசையமைக்கப் போவது யார், உடன் நடிக்கப் போவது யார் என்ற தகவல் இன்னும் வெளியாகவில்லை. கமல்ஹாசன் அடுத்து நடிக்கப் போகும் இரண்டு படங்களுமே இரண்டாம் பாகப் படங்கள் என்பது குறிப்பிடத்தக்கது.
