ஹரிஷ் கல்யாண் நடிப்பில் உருவாகி இருக்கும் படம் தனுஷ் ராசி நேயர்களே. இதனை நடிகரும், இயக்குனருமான சந்தான பாரதியின் மகன் சஞ்சய் பாரதி இயக்கி உள்ளார். ஜோதிடத்தை தீவிரமாக நம்பும் ஹிரோ, தனக்கு மனைவியாக ஏற்ற ராசி உடைய பெண்ணை தேடுகிற கதை.
இதேபோன்ற கதை அம்சத்துடன் உருவாகி உள்ளது ‛திருவாளர் பஞ்சாங்கம்’ என்ற படம். இதில் ஹீரோ எல்லா பிரச்சினைகளையும் ஜோதிடத்தின் மூலம் தீர்த்து விட முடியும் என்று நம்புகிறவர். சின்ன சின்ன பிரச்சினைகளை தீர்த்தும் வைக்கிறார். ஒரு பெரிய பிரச்சினையில் நண்பர்கள் சிக்கி கொள்கிறார்கள். அதை ஜோதிடத்தின் மூலம் அவனால் தீர்க்க முடிகிறதா என்பதுதான் கதை.
அலர் ஸ்டுடியோஸ் சார்பில் மலர்விழி நடேசன் தயாரித்து, இயக்குகிறார். நாயகனாக ஆனந்த் நாக் நடித்துள்ளார். காமெடி கதாபாத்திரத்தில் காதல் சுகுமார் மற்றும் ஊர்வசி நடித்துள்ளனர். இவர்களுடன் முக்கிய கதாபாத்திரத்தில் ஆடுகளம் நரேன், சுதா, கௌதம் மற்றும் சி.எம் பாலா ஆகியோர் நடித்துள்ளனர். ஒளிப்பதிவு காசி விஷ்வா, இசை ஜேவி.
இப்படத்தைப் பற்றி இயக்குனர் மலர்விழி நடேசன் கூறியதாவது: படித்து பட்டம் பெற்ற அப்பர் மிடில் கிளாஸ் வாழ்க்கை வாழும் ஒரு சராசரி வாலிபன் ஜோசியம், ஜாதகம், நல்ல நேரம் இவைகளின் மீது அதிகப்படியான நம்பிக்கை வைத்திருக்கிறான். தனக்கோ அல்லது தன் நண்பர்களுக்குக்கோ எதாவது பிரச்சினை என்றால் அதனை ஜோதிடம் மற்றும் நல்ல நேரம் போன்றவற்றை பார்த்து பயன்படுத்தி தீர்த்து கொள்கிறான்.
திடீரென ஒரு பெரிய பிரச்சினை வர, ஜாதகத்தை கடை பிடித்து அந்த பிரச்சனையில் இருந்து வெளி வருகிறானா? அல்லது ஜாதகம் அவனை கைவிடுகிறதா? என்பதை மிக சுவாரசியமாக சொல்லியிருக்கிறேன். கதாநாயகனின் ஏழு நாள்கள் பயணம் தான் இப்படம். என்றார்
