சோமாலியா வெடிகுண்டு தாக்குதல்: பலி 276 ஆனது

சோமாலியா தலைநகர் மொகதிசுவில் நேற்று 2 வெடிகுண்டு தாக்குதல்கள் நடைபெற்றன. வெடி குண்டு நிரப்பிய லாரியை ஓட்டல் ஒன்றின் மீது மோதி பயங்கரவாதிகள் தாக்குதலை நடத்தி உள்ளனர். இதில் ஓட்டலில் பெரும் பகுதியும், அதன் அருகே இருந்த பல கட்டிடங்களும் இடிந்து தரைமட்டமாயின.
குண்டு வெடித்ததால் பீதி அடைந்த மக்கள் சிதறி ஓடியதால் ஏற்பட்ட நெரிசலில் சிக்கி பலர் உயிரிழந்தனர்கள். பலரம் காயமடைந்தனர். இந்த பயங்கர வெடி குண்டு தாக்குதலில் நேற்றைய நிலவரப்படி 85 பேர் வரை இறந்திருப்பதாகவும், ஏராளமானோர் பலத்த காயங்களுடன் மருத்துவமனைகளில் சேர்க்கப்பட்டிருப்பதாகவும் தகவல் வெளியானது. இவர்களில் மேலும் பலர் உயிரிழந்ததை அடுத்து பலி எண்ணிக்கை இன்று 276 ஆக உயர்ந்துள்ளது. 300 பேர் மருத்துவமனையில் சிகிச்சை பெற்று வருகின்றனர்.
கொடூர தாக்குதலுக்கு இதுவரை எந்த பயங்கரவாத அமைப்பும் பொறுப்பேற்கவில்லை. அல்கொய்தா ஆதரவுடன் இயங்கும் அல் ஷபாப் என்ற பயங்கரவாத இயக்கம் இத்தாக்குதலை நடத்தியிருக்கலாம் என கருதப்படுகிறது. தாக்குதலில் பலியானோருக்கு அஞ்சலி செலுத்தும் வகையில் சோமாலியாவில் 3 நாள் துக்கம் கடைபிடிக்கப்படும் என அதிபர் முகமது அப்துல்லாகி முகமத் அறிவித்துள்ளார். காயம் அடைந்தவர்களுக்கு ரத்த தானம் வழங்கி உதவுமாறு பொதுமக்களுக்கு வேண்டுகோள் விடுத்துள்ளார்.
தீவிரவாதிகள் நடத்திய தாக்குதலுக்கு சர்வதேச நாடுகள் கடும் கண்டனம் தெரிவித்துள்ளன. அமெரிக்கா மிஷன், துருக்கி, இங்கிலாந்து நாடுகளின் வெளியுறவு துறை அமைச்சகங்கள் மற்றும் ஆப்பிரிக்க யூனியன் கமிஷன் தலைவர் மவுசா பாகி மகமழத், பிரான்ஸ் அதிபர் இம்மானுவேல் மேக்ரன், ஐ.நா. பொதுச் செயலாளர் அன்டோனியோ குட்ரஸ் ஆகியோர் கண்டித்துள்ளனர்.